Mánudagsfréttir Dalheima 21. september
Við gerðum fjölmargt skemmtilegt hér í Dalheimum í síðustu viku. Veðrið var mestmegnis gott og við nutum útiverunnar eins og við gátum. Margir hafa fengið áhuga á frisbígolfi á síðustu dögum, aðrir tína ber af trjánum og hlaupahjólin okkar eru sívinsæl.
Geitungar gerðu innrás í geimstöðina og starfsfólk átti fullt í fangi með að hrekja þá út. Hann Baldur tónskáld hélt tónlistaklúbb í betri stofunni og setti saman glæsileg lög með krökkunum.
Varja hélt áfram með risaeðlubúningagerð og nú fer vonandi að styttast í risaeðluhátið. Hún leiraði einnig með krökkunum í listasmiðju og ýmis listaverk urðu til.
Haffi fór með krökkunum í 4. bekk vettvangsferð og þau fengu sér ís í öllum regnbogans litum.
Í bökunarklúbbi á þriðjudag fengu krakkarnir að baka brauð, búa til smjör úr rjóma (eins og í gamla daga) og baka nýuppteknar kartöflur úr garðinum okkar. Allir krakkarnir í Dalheimum fengu svo að smakka afraksturinn. Vikan hefur því verið fjölbreytt og skemmtileg og einkennst af matarlykt og góðri stemmningu.
Því miður skemmdist minniskortið í myndamélinni okkar svo allar myndir frá vikunni glötuðust – nema örfáar myndir frá ísferðinni með 4. bekk.
Recent Posts