Ofbeldisforvarnaskólinn fræddi unglinga í Buskanum
Miðvikudagskvöldið 16. janúar fengu unglingar í Buskanum kunnuglegt andlit í heimsókn þegar Benna Sörensen, fyrrum forstöðukona Buskans, kom til okkar með fræðsluna „Ekki standa hjá“. Síðan Benna hætti hjá okkur í Buskanum hefur hún flakkað félagsmiðstöðva á milli og frætt unglinga um áhrifaríkar leiðir til þess að bregðast við hvers konar ofbeldi sem þau gætu orðið vitni að.
Fræðslan byggir á áhorfenda nálgun sem er þrautreynt módel af forvörnum gegn kynferðislegu ofbeldi og áreitni og gengur út á að valdefla ungmenni sem verða vitni að ofbeldi, til að bregðast við á öruggan hátt. Starfsfólk Buskans var einnig viðstatt fræðsluna og tók þátt í umræðum en það gerðum við til að fræðast með unglingunum og til að undirstrika að við erum alltaf til í að taka umræðuna með þeim ef þau þurfa á að halda.
Á næstu dögum verður því einnig sendur út póstur til foreldra um fræðsluna ásamt umræðupunktum sem hægt er að nota heima við og halda umræðunni á lofti með unglingunum. Við vonum að við getum saman hvatt unglingana okkar til þess að bregðast rétt við þegar þau verða vör við ofbeldi og ekki standa hjá.