Starfsdagar unglingastarfs
Vikan 11. – 15. september var frekar óvenjuleg hjá starfsfólki unglingastarfs Kringlumýrar.
Á mánudag og þriðjudag tóku forstöðumenn og aðstoðarforstöðumenn félagsmiðstöðva hverfanna sér frí frá sínum daglegu verkefnum og héldu saman upp í Bláfjöll þar sem markmiðið var efla hópinn, gera upp liðinn vetur og stilla saman strengi fyrir þann næsta. Hápunktur ferðarinnar má segja að hafi verið hellaferð inn í Djúpahelli undir öruggri leiðsögn Haralds Sigurðssonar, framkvæmdastjóra Kringlumýrar. Förinni var heitið innst í hellinn þar sem hópurinn þurfti að vinna saman til að ná því takmarki. Inni í hellinum var hvert tækifæri nýtt til ígrundunar eins og í raun ferðinni allri. Þá fengu starfsmenn einnig kynningu á hugmyndafræði sálfræðingsins Martin Brokenleg og hún skoðuð út frá því starfi sem unnið er í félagsmiðstöðvunum.
Eftir stutt stopp í borginni tóku svo við starfsdagar Samfés á fimmtudag og föstudag en þetta árið voru þeir haldnir á Laugarvatni. Á starfsdögum koma saman starfsmenn félagsmiðstöðva alls staðar af landinu og skapast þar einstakur vettvangur til að kynnast kollegum þvert á landshluta og deila hugmyndum og verkefnum úr starfinu. Formlega dagskráin samanstendur af fyrirlestrum og málstofum frá ýmsu fagfólki og samtökum sem erindi eiga við starf félagsmiðstöðvanna á einn eða annan hátt.
Eftir vikuna má með góðu móti segja að starfsfólk félagsmiðstöðvanna sé tilbúið til að takast á við þau fjölmörgu verkefni vetrarins sem bíða og hlakka allir til komandi missera.