Dalheimafréttir 4. janúar 2021
Við höfðum það verulega huggulegt um jólin. Vegna þess hve hópurinn var lítill var engin hólfun á milli skóla eða bekkja. “Þetta er eins og í gamla daga” sögðum við hvert við annað þegar við heilsuðumst á morgnana; engar grímur, engar lokaðar hurðir og allt eðlilegt.
Veðrið var ekkert sérlega gott yfir hátíðarnar svo við héldum okkur að mestu heima við, en fórum þó einu sinni í bíó og einu sinni að renna okkur á rassaþotum. Þess á milli föndruðum við ýmislegt, perluðum og bökuðum. Reyndar er ekki ólíklegt að heimsmet hafi verið sett í perlum þessa daga og eflaust fengu einhverjir foreldrar perlulistaverk frá sínum börnum.
Á jólunum er gott að horfa á jólamyndir, hlusta á jólalög, steikja heimagerð laufabrauð, baka smákökur og skreyta piparkökur. Svo vilja sumir meina að það séu engin jól án heimagerðra kanilsnúða með rúsinum. Við gerðum þetta allt saman og komumst í skínandi jólaskap. Hápunktinum var svo náð með grilluðum sykurpúðum.
Með þessum orðum óskum við ykkur gleðilegs nýs árs og hlökkum til skapandi og skemmtilegrar samvinnu á fyrsta ári nýja áratugarins!