Bústaðir – Félagsmiðstöð

Í félagsmiðstöðinni Bústöðum er virkt starf fyrir krakka í 5., 6. og 7. bekk í Breiðagerðisskóla og Fossvogsskóla. Hver og einn árgangur hefur sinn tíma í Bústöðum og gefst því krökkunum tækifæri til þess að hitta jafnaldra sína í öllu hverfinu utan skóla.

Fjórir starfsmenn hafa umsjón með starfi Bústaða fyrir 10 til 12 ára krakka. Dagskráin er skipulögð í samstarfi við krakkana fyrir hvern mánuð fyrir sig. Dagskráin hangir á upplýsingatöflu og hún er send á foreldra og forráðamenn með tölvupósti í upphafi hvers mánaðar. Einnig er hægt að nálgast dagskránna á heimasíðu Bústaða.

Markmið með starfi Bústaða er að skapa gott og þægilegt umhverfi fyrir alla krakka þar sem þau njóta sín í leik og starfi. Félagsstarfið er öllum að kostnaðarlausu en einstaka sinnum neyðumst við til þess að hafa skráningu í starfið. Það á helst við um vinsæla viðburði þar sem við viljum tryggja að allir sem mæta geti tekið þátt innan opnunartímans og til þess að gera sér grein fyrir hversu mikið þarf að versla af aðföngum fyrir viðburðinn.