Nýr forstöðumaður í Dalheimum
Nú hefur Guðlaugur (Gulli) lokið störfum sínum hjá Dalheimum og farinn að kenna í FB. Á meðan við óskum honum góðs gengis með það bjóðum við Lilju Mörtu velkomna til starfa sem ný forstöðukona í Dalheimum.
Lilja Marta hefur verið frá árinu 2017 að vinna í frístundaheimilinu Laugarsel sem aðstoðarforstöðukona og umsjónamaður Réttindafrístundaverkefnis UNICEF. Áður var hún að vinna í félagsmiðstöðinni Öskju sem frístundaleiðbeinandi með umsjón, eða frá árinu 2012 og er því með alls konar reynslu að baki. Hún er með BA í félagsráðgjöf og er á öðru ári í M.ed námi í Tómstunda-og félagsmálafræði.
Ásamt Lilju Mörtu verður Gunnar Oddur aðstoðarforstöðumaður, en hann byrjaði að vinna í Dalheimum í byrjun sumars. Gunnar hefur einnig ýmsa reynslu á baki í frístunda- og félagsmiðstöðvargeiranum. Hann hefur grunnmenntun í Tómstunda- og félagsmálafræði. Ásamt því að vinna í Dalheimum er Gunnar að dæma á fótboltaleikjum Pepsi Max deildarinnar.
Nú fara sumarnámskeiðum Dalheima að ljúka en síðasta námskeiðið er í næstu viku, 16.-19.ágúst. Sumarið hefur gengið vel, fengið fullt af góðu veðri, sérstaklega þessa viku. Þá höfum við gert ýmislegt skondið og skemmtilegt. 20. og 23.ágúst eru starfsdagar í Dalheimum. Samkvæmt áætlun er þá fyrsti dagurinn í Dalheimum 24.ágúst.