Útilega í Þróttheimum!

Hvað er best að gera á fyrsta ALVÖRU snjókvöldi vetrarins. Okkur í Þróttheimum fannst allavegana tilvalið að halda útilegu inni. Varðeldur frá skjávarpanum uppi á vegg, 22 ferðalög með KK og Magga Eiríks í græjunum og kakó í plastglösum frá Rúmfatalagernum…það hljómar eins og útilega fyrir okkur. Mánudaginn 29.nóvember héldum við útilegu inni og buðum við unglingunum upp á sígildar útileguafþreyingar eins og Kubb mót og Smores gerð. Það þurfti reyndar að glíma við þann vanda hvernig ætti að grilla sykurpúða inni en við settum bara brauðristina í samband. Vissulega voru margir sem voru aðeins spenntari fyrir snjónum sem var nýmættur á höfuðborgasvæðið og skelltu sér í snjóstríð! En þá var gott að geta komið aftur inn, gripið sér kakóbolla og hlýjað sér á milli orrusta. Alveg hreint yndisleg kvöldstund með þessum frábæru unglingum sem sækja starfið okkar í Þróttheimum. Núna fer stóri jólamánuðurinn að renna í hlað og ætlum við að fylla hann af jólaskreytingum og notalegheitum.

Bestu kveðjur

Starfsfólk Þróttheima