Vika 6 í Þróttheimum – Kvöld 1

Nú er Vika 6 í gangi í öllum grunnskólum og félagsmiðstöðvum í borginni og að sjálfssögðu tökum við í Þróttheimum þátt í því. Vika 6 er heil vika í febrúar sem er tileinkuð kynheilbrigði. Starfsstöðvar skóla- og frístundasviðs Reykjavíkurborgar standa fyrir kynfræðslu af ýmsum toga og er mismunandi þema á hverju ári. Í ár er þemað kynlíf og menning. Við í Þróttheimum byrjuðum vikuna á því að halda „Game show“ sem er einfaldlega spurningakeppni í allskonar flokkum sem snýr að kynlífi, getnaðarvörnum, kynheilbrigði svo eitthvað sé nefnt. Í keppninni voru bjölluspurningar, fullyrðingar þar sem unglingarnir þurftu að komast að því hvort þær væru sannar eða lygi og svo vísbendingaspurningar. Með spurningakeppninni langaði starfsfólki að fræða unglingana á meðan þeir tóku þátt í æsispennandi keppni. Næst á dagskrá hjá okkur er svo kjaftað um kynlíf með kræsingum við kertaljós á miðvikudagskvöld. Þar fá unglingarnir tækifæri til að senda inn nafnlausar spurningar til starfsmanna sem eru svo teknar fyrir og ræddar í öruggu umhverfi. Hér að neðan má finna eina af vísbendingaspurningunum sem unglingarnir þurftu að svara í keppninni. Rétt svör mega berast á netfangið throttheimar@rvkfri.is allir sem svara rétt mega koma og fá frían kaffibolla hjá okkur í Þróttheimum. Gleðilega viku 6 og eigið góðan dag.

Spurt er um menningarafbrigði

Vísbending 1: Þetta er að finna allt í kringum okkur og hefur áhrif á það hvernig við hugsum um okkur sjálf og viðhorf okkar til kynlífs.

Vísbending 2: Við getum séð merki allt í kringum okkur t.d. fataauglýsingar þar sem fyrirsæturnar eru í pósum sem engin manneskja myndi ósjálfrátt detta í.

Vísbending 3: Þegar talað er um þetta er verið að vísa til þess hversu útbreitt og aðgengilegt klám er orðið.