Heili dagurinn, hugmyndakassinn og vetrarfríið

Þá er vetrarfríið búið og Krakkaot farið aftur á fullt. Það verður margt skemmtilegt gert í þessari  viku eins og t.d. skemmtilegir leikir í íþróttasalnum, klippimyndaklúbbur með Bjarna, ævintýraklúbbur með Kristjáni og 4. bekkjarfjör með Hafdísi og margt fleira.

Heili dagurinn seinasta miðvikudag í Krakkakoti heppnaðist mjög vel. Við fórum ekki í neina sérstaka ferð heldur eyddum við deginum í skemmtilegum klúbbum hér í Krakkakoti. Við vorum t.d. með playstation og kaplakubbaturnakeppni inn í Kósíkoti, perlur og föndur inn í föndurkoti og spil og lestur inn í Leikjakoti. Við notuðum íþróttasalinn grimmt en þar gátu börnin farið í leiki og leikið sér frjálst. Svo skelltum við okkur út í góða veðrið til hressa upp á liðið áður en síðdegishressing var en þar fengu börnin kleinur og ávexti.

Hugmyndakassinn

Á meðan börnin voru í vetrarfríi var starfsfólk Krakkakots á fullu við að þrífa svæðið og breyta og bæta stofurnar. Það var settur upp hugmyndakassi inn í Leikjakoti en það er í tengslun við barnalýðræðisátak sem er í gangi á öllum frístundaheimilum í Reykjavík. Þar geta börnin sett hugmyndirnar sínar um klúbba, síðdegishressingu eða hvað sem þeim dettur í hug sem hægt væri að gera í Krakkakoti. Síðan verða hugmyndirnar ræddar á svokölluðu barnaráði sem verður á tveggja vikna fresti en það er „fundur“ sem börnin geta valið sig á. Þar verða hugmyndirnar ræddar, flokkaðar og svo yrði ákveðið hvaða tvær hugmyndir myndu vera framkvæmdar á næstu vikum.

Á mánudeginum var svo öllum börnum og foreldrum, systkynum og ömmum og öfum boðið í Fjölskyldu og Húsdýragarðinn en þar var margt í boði. Þar var hægt að fá grillaðar pylsur og safa, búa til köngla óróa með Ástu, skella sér í trommuhring með Markúsi og svo var hægt að fara í skylmó með Samuel. Einnig var í boði að labba um garðinn, skoða dýrin og fara í þau tæki sem voru opin.