Leshorn Glaðheima

Það er hið endalausa vandamál frístundaheimilanna að búa til rólegt og gott leshorn og Glaðheimar eru engin undanteking frá því vandamáli. Það efast enginn um mikilvægi þess að börnin eigi möguleika á fá að fara í rólegt rými, þegar það hentar þeim, í kringumstæðum sem eru jafn orkumiklar og frístundastarf. Þetta kemur líka fram í foreldrakönnunum ár eftir ár þar sem foreldrar óska eftir því að börnin hafi betri möguleika í rólegum rýmum. Það er hins vegar hægara sagt en gert að framkvæma það. Við í Glaðheimum höfum breytt rýmunum okkar reglulega síðustu ár til þess að reyna að mæta þörfum barnanna eða til að reyna að bæta aðstæður fyrir hitt og þetta. Hjartað hefur verið rólega rýmið okkar síðasta rúmlega árið þar sem við höfum reynt að hafa þar spil og lestur. Lesturinn hefur hins vegar lent í farþegasætinu og við höfum því reynt að færa það inní betri stofuna. Þar höfum við hins vegar sjaldan starfsfólk og því erfiðara að fylgja því eftir. Núna ætlum við að gera aðra tilraun til þess að gera betri stofuna að rólegu lesrými án þess þó að þar sé alltaf starfsfólk. Reglurnar í betri stofunni eru að þar á alltaf að vera opin hurð og þar á bara að vera rólegur leikur. Þetta tekst vissulega ekki alltaf þar sem það er freistandi að byrja að byggja úr púðunum, klifra í sófanum eða hreinlega fara í koddaslag.

Ef þið hafið tekið umræðuna við börnin ykkar um að þeim vanti rólegt rými og séu of þreytt eftir daginn í Glaðheimum þá megið þið endilega hvetja þau til þess að fara í Betri stofuna og minna þau á hvernig reglurnar eru. Við ætlum að gera okkar besta til þess að halda þessu rými rólegu þannig að börnin geti sótt þangað i hvíld og rólegheit.

p.s. það skal tekið fram að myndin hér að ofan er uppstillt, bókahillan er því miður ekki alltaf svona vel uppröðuð eftir daginn