Dagskrá unglingastarfs Þróttheima í desember
Eftir viðburðaríkan nóvembermánuð hlökkum við til að halda inn í rólegan desember og eiga notalega stund saman í skammdeginu.
Unglingar Þróttheima hafa verið gríðarlega virkir síðasta mánuðinn. Femínistafélag skólans hélt bingó á félagsmiðstöðvadaginn og rann allur ágóði af því til Stígamóta. Einnig fengum við Kraft, félag ungs fólks sem glímir við krabbamein, til að koma og halda stuttan fyrirlestur á meðan við perluðum til styrktar félaginu. Skólinn keppti í Skrekk og stóð hópurinn sig frábærlega og kom reynslunni ríkari heim úr Borgarleikhúsinu. Við kepptum einnig á Laugardalsleikunum, íþróttamóti skólanna þriggja í Laugardalnum, og fórum með sigur af hólmi.
Fram undan er rólegur mánuður og hlökkum við til að eyða huggulegum stundum með unglingum skólans. Í fylgiskjali er dagskrá mánaðarins, jólaballið verður fimmtudaginn 19.des og föstudaginn 20.des ætla Þróttheimar að bjóða nemendum og foreldrum að koma við hjá okkur í heitt kakó og pakka inn jólagjöfum á umhverfisvænan hátt.
Einnig viljum við minna á að Þróttheimar loka EKKI á sömu dögum og skólinn og lokum við aðeins á rauðum dögum. Það er opið föstudaginn 20.des, mánudaginn 23.des, föstudaginn 27.des og mánudaginn 30.des. Á þessum dögum er engin ákveðin dagskrá, bara opið hús og hugguleg stemning fyrir þá sem hafa áhuga.