Þróttheimar á Stíl 2019
Hönnunarkeppnin Stíll fór fram í íþróttahúsinu Digranesi um helgina og átti félagsmiðstöðin Þróttheimar eitt lið í keppninni. Stíll er árleg hönnunarkeppni á milli félagsmiðstöðva þar sem keppt er í hárgreiðslu, förðun og fatahönnun út frá ákveðnu þema. Í ár var þemað 90´s tíska. Saga María Sæþórsdóttir, Hólmfríður Ásta Halldórsdóttir og Birta Sól Helgadóttir tóku þátt í ár fyrir hönd Þróttheima. Þær sóttu meðal annars námskeið á vegum Samfés þar sem hár og förðunartíska áratugsins var krufin og tvinnuð inn í fatahönnunina. Saman unnu þær að allri hönnuninni en Hólmfríður tók einnig að sér að sýna afraksturinn á sviði og hlaut fyrir það framkomuverðlaun enda með eindæmum flott á sviði.
Hönnunarkeppnin Stíll er til að hvetja unglinga til listsköpunar og um leið gefa þeim aukin tækifæri til frumlegrar hugsunar og sköpunarhæfileika. Vekja jákvæða athygli á því hvað unglingar eru að gera á sviði sköpunar og gefa þeim kost á að koma sínum hugmyndum á framfæri utan félagsmiðstöðvanna
Við óskum þessu flotta teymi til hamingju með frábæran árangur og hlökkum til að sjá þær stíga aftur á svið á næsta ári.