Stemning í Tónabæ í upphafi vetrar

Haustið byrjaði með hvelli hjá okkur í Tónabæ, enda allir mjög spenntir að koma aftur í félagsmiðstöðina sína eftir langt og gott sumar. Einnig voru margir að stíga sín fyrstu skref í félagsmiðstöðinni og eftirvæntingin eftir því.

Það hefur margt verið brallað það sem af er hausti, unglingadeildin hefur til að mynda haft bekkjarkvöld, borðað núðlur, verið í hörku leikjum í salnum, gripið í billiard, tölvuleiki og hin ýmsu spil (við erum alltaf að vinna í því að stækkja spilabankann hjá okkur. En svo fór unglingadeildin náttúrulega í sóttkví á dögunum, þar var ekki slegið undan, heldur færðist starfið okkar yfir á rafræna miðla svosem instagram, tiktok og zoom. Við meðal annars bjuggum til kókoskúlur saman í gegnum zoom, þar sem nemendur gátu óskað eftir poka með öllum innihaldsefnunum og við keyrðum pokana til þeirra og um kvöldið hittumst við öll á zoom og bjuggum til kúlur og kjöftuðum.

Blessunarlega eru allir lausir úr sóttkví og er starfið komið í eðlilegt horf.

Miðstigsstarfið er búið að vera ansi fjörugt, líkt og í unglingastarfinu, þá höfum við haft nóg á prjónunum. Á dagskránni hefur meðal annars verið föndur, spiladagur, kókoskúlugerð, varúlfur og karaoke. Karaokíið gekk mjög vel og var mikil stemning í hópnum fyrir því að syngja og að horfa á félaga sína leika listir sínar.